ردا على الشاعر استاذنا الكبير حسنين السيد
وعلى استاذنا الشاعر الكبير مهندس عطيه شواش
جايه المراكب والأمـل زوادهـــا
راكبين عليها بناتها ويا ولادها
لبـوا الـنـدا اول إشاره وندهــه
مـينا وحـسـن وتريزا ويا بهـيه
----------------------------
جايه المراكب شقه موجة نيلهــــا
وشبابها الاخضر ورد بيغنيلهـــــا
مين اللى يقدر يوم يهد ف حيلها
طول م الولاد صاحيين لكل رزيـه
----------------------------
جايه المراكب بالمـكن دواره
تغزل خيوط القطن يا نــــواره
نكـبر شويه شويه بالقطــــاره
عايقين كده باللاسه والجلابيـه
---------------------------
جايه المراكب ثوره ليها أصولـــــها
من ألف عام مستنيين ف وصولــهـا
وألف ديب واقفين كده يبصولــــها
يحكميك يا مصري من عيونهم ديـه
--------------------------
جايه المراكب يونس انت أملهـــا
الحوت ممد م الجنوب لشمالهــــا
حوتك رحيم وحوتنا سارق مالها
ادعي لنا ربك تبقى ايدنا قويــــه
--------------------------
جايه المراكب وايزيس ويــَّــاهـا
حورس بيبكي بحزن ويا بكاهـا
دلوقتي لازم تبقى إيـدنا معاهـــا
أوزريس حتت متقطعه ومرميه
---------------------------
جايه المراكب بس فيها فراعـنه
عارفـين ألآمنا وكل ما يوجعنـــا
لكنه ( مـينــا ) من زمان ودعـنا
فضعنا بين اهـبل وبين حرامـيـه
---------------------------