مولد يا ثورة

مولد يا ثورة
وناس كتير وخلق يامه
وعيال صغار وناس بتقول يلة السلامة
وبلطجية وزحمة وخناقة على كوم لمامة
وشباب منور كما قمر فى ضلمة نور
وبيعين وبتوع عصير
واشترى علم واقف وشوح وارسم على وشك علم
بس النسر مش على الوش لا على القفة منور
وناس تتطبل وناس تزمر
بنبيع فى ثورة ونأجر مشاعر
ونتاجر فى خيبة وكلام يهز المشاعر
مولد يا ثورة
ونروح نزور الميدان دا بقا حلقة ومقام
ونشوف عشاق مش فى مصر لا دا اللى دايب وعاوز يرضى المدام
ودا اللى خايب وماسك ايديها بيقولها بالثورة هجبلك شقة وفيها حمام
وكلام كتير ودنك تحتار تسمع مين ولا مين
وتصدق ولا دا كلام رغى من الجرانين
وكلو بيشتم وكاميرا تصور
ومذيعة حلوة بتقولك عوزين معاك نصور
ويفطة بيضة والتانية سودا مكتوب عليها اسم شهيد
كان هنا مكانك بس مكنش جى يتصور
مولد يا ثورة
وكلها كام يوم ويتحول التحريرلمولد سيدى الغفير
وتظهر كرامات وبدع وحركات ولا سيدى نصير
وبقينا فى مولد حلاوة وحمص وفشار كتير
وترمس واقعد واتسلى لحد ما يجيلك خبربالخير
الحق يا جميل حلوُ الحكومة والجيش فيه انقلاب خطير
ونرجع نلف ونبص ونكلم نفسنا ونقول ما كان رماها لو كان فيها الخير
مولد يا ثورة

اخي الشاعر أيهاب
مولد لثورة مش وهم و لا أحلام
ده ثورة من قلوب شابة لا تعرف الأنهزام
ارواح طايرة و قلوب صافية تنشر النور مش الظلام
و بيدهم البرئية أنقشع غيوم الظلم و القهر
و اتحققت جوه قلوبنا خطوات عدل من السماء
قادر ربنا ينصر الغلبان اللي عايش بيقول بس يارب

كلمات جميلة اخي الشاعر
مست قلوبنا و نشر رحيقها الزهور
بارك الله فيك
بقلبك النابض بالخير

كنوز

طول ما فيه ثورة بتنادى للخير

ح يعلا صوتنا ويلف الدنيا ينادى بالتصحيح

فى كلمة صاحية وواعية عارفين رايحين فين

ومعدناش نمشى ورا ده وده وخلاص اصبحنا وضحين

ومعدناش نبيع كلمتنا ولو بميت فضة ولا جنيه

وصوتنا عالى وكلمتنا عارفه رايحة فين

متقلوش ميدان تحرير ولا غيره الميدان ما هو الا طريق

نعدى منه وهو شارع بيوصل للتصحيح

خلاص الشباب بقى فاهم حيكلم مين ويقول ايه

ومبقاش مربوط فى ساقية وداير ورا كل لئيم وخسيس

شكرا اخى ايهاب على كلماتك فى مولد الثورة