عمار يامصر
مافيش كائن من كان زار معتقل القلعه فى المده من 1950 الى1975 مايعرفش الشاويش سرحان شيخ المخبرين العتيد اللى دوب من الضباط والمعتقلين عدد شعر راسى انا لانه اصلع وعم سرحان ذو البنطلون الكاكى والقميص اللى بلا الوان والكرش اللى بالعرض راجل خفيف الدم حاضر البديهه والنكته فاهم الفوله فى لعبه السياسه من طول وكتر ماشاف معتقلين من شتى الاتجاهات والافكار السياسيه وخرج من دا كله بقناعه يقينيه مؤداها ان الكف سابق سابق يعنى الشاطر هو اللى يضرب الاول ويركب هى دى لعبه السياسه يابو نجم ياخويا انما غير كده ماتقوليش وذات عصريه صيف جميله لقيت عم سرحان داخل على بكوبايتين شاى صعيدى وقعدنا سوا نشرب شاى العصارى وسألته:
-- اظن ياعم سرحان ماتقدرش تعد الناس اللى مروا عليك هنا
قال لى:
يووووه.. على رأى المثل ياما دقت ع الراس طبول.. ياما ناس جت من كراسى السلطه على هنا , وياما ناس طلعت من هنا على كراسى السلطه عدل.
لكن تعرف كل الهلمه دى ماحدش عرف يجاوب على سؤالى الى يومنا هذا.
قلتله:
سؤال ايه؟
قال لى:
كلمه عمار يامصر اول ماطلعت طلعت منين؟
قلت له:
وطبعا انت منتظر الاجابه منى؟
قال لى:
لآ ياسيدى.. اقولها لك ورزقى على الله .. ايام الحكم الملكى كان فيه للسياسيين سجن خصوصى اسمه سجن الاجانب, وكان ايامها اخواننا فى المغرب يطلعوا للحج مشى على رجليهم.
قلت له:
- طبعا عشان الثواب يبقى اكبر.
قال لى:
-- مش نظريه ثواب.. مامعاهمش زى حالاتك. انما الثواب ده بتاع ربنا , كان النفر من دول يطلع من بلاده السنه دى يادى الفريضه السنه اللى بعدها, يرجع لبلاده السته اللى بعد اللى بعدها , وهناك يقولو له ياحاج.
قلت له:
بس كده؟
قال لى:
-- امال يعنى حيدوله نيشان. وكان اول مايوصلوا مصر المحروسه يطلعوا الحسين وام هاشم يلقطوا رزقهم , ماهو برضه الجوع كافر,فكانوا يمسكوهم تحرى , ودول حمايه فرنساوى, فيبعتوهم على سجن القلعه هنا لآنه سجن اجانب درجه ثالثه. وسنتها انا كنت لسه تحت التمرين, واذا بتلات لوارى واقفين على باب السجن ونزلوا منهم امم , لكن كان شكلهم هفتانين ومبهدلين وحالتهم تصعب ع الكافر , قمنا شغلنا الميه السخنه ودخلناهم ع الحمام عدل , وصرفنالهم بيجامات جديده وفوط وصابون وشباشب الشاى , وخرجوا م الحمام دخل لهم الغدا , وبعد الغدا شربوا الشاى , واذا بيهم فى نفس واحد حوالى تلتميت معتقل بيهتفوا :
عمار يامصر , وانا والشاويش دياب ميتين على روحنا م الضحك .. الله يرحمك ياعم دياب .. تبقى طلعت منين بقى كلمه عمار يامصر.
قلت له:
- من هنا طبعا.
ضحك وقال لى:
-- عفارم على عشرة زى حضرتك.
( نقلا من كتاب الفاجوميات للشاعر احمد فؤاد نجم )
(الناشر : دارالحسام)
الطبعه الاولى 1998
من صفحه11 الى صفحه 15
