(( فات الأوان ))

( فات الأوان )


كنت فى مَعْـزة واحده جارتنا
وبعد الدّفنه قابلنى حسين
قال لى تعالى نزور أمواتنا
ونزرع نخله وصبّارتين
قولتله طبعا هأجى معاك
وأهو بالمره أزور وياك
كل مدافن الأسره هناك
ونقروا الفاتحه كمان وياسين
*****

وراح ماسك فى جدارفسْقيه
ودموعه م العين بتكـُـبْ
قولت له أهْدَى ياعم شويه
بأذن الله هايزول الكرب
رد عليا بكلمة أه
بس همومه كانت جوّاه
وهوّ بيبكى يقول ياماه
سامحينى وارحمنى يارب
*****
كنتى الخير والبركه ف دارى
وأنا تايه مشغول فى حياتى
عمّال أجرى أجيب وأدارى
مش عايز غيرأرضى مراتى
وعييتى مسألتش فيكى
ومراتى ليلاتى بتشكيكى
دلوقتى لو أطول رجليكى
راح أشلهم على راسى يوماتى
*****
ضاقت بيا خلاص الدنيا
من بعد ما سبتينى ف همىّ
مش طايل لحظة حنيّه
ومين غيرك ها يروّق دمىّ
دُقـْت المر أشكال وألوان
بأشرب فى كاسات الحرمان
ضاعة منى الصحه كمان
لما غضبتى عليا يا أمى

*****
أه لو كان العمربيرجع
آه لو اشوفك حتىّ ثوانى
غضبك ياأمه ف جسمى بيوجع
بس ماعادش يفيدنى أمانى
قولت يا صاحبى كلامك ليا
خللا دموعى تذيد ف عنيه
ويبقى أنا لازم أجرى شويه
أروح عند أمى ما أسبهاش تانى
*****