سعدالشرقاوى
شخصيات مميزة
تاريخ التسجيل : 06/02/2012
العمر : 62
 | | موضوع: ح أقول رأيى السبت سبتمبر 15, 2012 11:14 pm | |
|
(أقول رأيي)
إوعه تفكر إنىّ خبير
صاحب فكر وشئ يستاهل
دا أنا فلاح والكـُمْ كبير
قول م الآخر انسان جاهل
,,,,
لكن نفسى ف شي من حقىّ
تسمع رأيى وأسمع رأيك
لمّا نقول فى شئون دوْلتنا
وتقبل إنىّ مواطن زيّك
,,,,
إزّاى نقدر ننهض بيها
وكل شئونها ف إيد جاهلين
والىّ دراسته الطب البيطرى
نلقى جنابه وزير تموين
,,,,
وان كان حدْ معاشه مبكـّر
دارس فاهم فى الحربيّة
أحسن مهنة نجاملوه بيها
يمسكلى الثروة السمكية
,,,,
كل محافظ مُش فى مجاله
ياخد الخبْرة من البوّاب
وماجستير مركون فى الشارع
شاب الفكر وهوّ شباب
,,,,
وأمّا نحنْ عليه بوظيفة
يروح فى مجال مايليقش عليه
يومها نضحىّ بعلمه بحاله
وبنرقيّه لو يفشل فيه
,,,,,
إمضى حضورك وإعمل عُمْرة
بسْ تكون فى الدفتر حاضر
وإضرب واقتل وانت موقــّع
راح نحميك من أىْ محاضر
,,,,
دا السبّاك فى المايّه بيفهم
إسم الصنف وإسم النوع
والمسئول فى الشركة مايعرف
شكل التــّهْ من شكل الكوع
,,,,
والىّ بيرْؤس حىْ ما حيلته
غير ع الورقة نشوف توقيعه
ويتهيأله الشارع ملكه
لو محتاج لفلوس حا يبـيعه
,,,,
فوانيس ع الدولى وصحراوى
ونورها الضهر يكون شغال
وانت ياويلك ياسواد ليلك
علشان بنخفف أحمال
,,,,
واللى يغيظك فى الموضوع
كمْ رواتب بالملايين
غير بدلات ومنح وحوافز
والباقى بياخد ملاليم
,,,,,
وأنا وانت دايرين فى الساقية
وبنعانى م الفقر تمللىّ
بنحيىّ علمها وبنسقف
وبنهتف ونقول ياحلولىّ
,,,,,
وأمّا ح تطلع سنْ معاش
لمْ العدّة ومستنداتك
وكل الدولة ماتكتب (شكرا)
تيجى (إستغنت عن خدماتك)
,,,,
أمّا صحاب الحظ ياسيدى
كله يبارك كله يجامل
كأنه محلل والدكتور
قال مبروك الأستاذ حامل
,,,,,
لو قولنا أهداف الثورة
بتقولوا م الآخر عيّل
وان قولنا أيّام ونعدّى
بنلاقى الأحوال تتـنيّل
,,,,,,,,
| |
|
محمد لبيب مصيلحى
مشرف
تاريخ التسجيل : 25/06/2012
العمر : 54
| | موضوع: رد: ح أقول رأيى الثلاثاء سبتمبر 18, 2012 4:23 am | |
| الله الله على جمال حروفك وروعه كلامك
تسلم اناملك | |
|
