الاصدار الخامس الشاعر / عادل سند ** الميه والساقيه **

الشاعر / عادل سند
** الميه والساقيه **
===============

صاج السواقى إشتكى من كُتر ميّتنا

طب قولوا ليه م العطش شيّعت ميتنا ؟

والغُسل لمّا إتمنع م الكفر كلاّته

راحوا يعبّوا السيل وبيملوا تنكاته

وقلوبنا كالها الصدا والحسره أكلتنا

ياخضره إيه خضّرك ؟ غير ميّة الساقيه

عالبعد ليه تنبتى ؟ وتيرانها مش لاقيه

راضى يلف يدور يسقى ف حواشيها

وعيونه ما تشوف نور وغمامه تغشيها

هوّه السبب فى الخير وبياكل الباقيه

ياساقيه رغم سنين قواديسها ماانسدّت

بتجيبى ميّه بطين ولا عمرها إسودّت

زرعه فى ظرف ايام بلقاها وف طولى

وغيطى ليه خاويان ما تردّى ما تقولى ؟

إيدك بتسقى الناس ولبُقى مااتمدّت

ياساقيه من ميّتك نمل الشقوق بيعيش

ياساقيه رغم الزمن دايره ما بتونّيش

وسألوا عن معدنك وبإيه ومعجونه

ياساقيه من دمّنا مطليه مدهونه

فعلاّ عشان دمّنا جسمك ما بيصدّيش

وبين غيطان الدره وكيزان ومخليّه

لا شفت يوم حسّون ولا حتى قِمريه

ما شفت غير الريح تقلع فى زرعاتى

وساقيه قايمه تدور تغرف فى دمعاتى

إبكى يا دمع العين عالطرح والميّه

ياساقيه هُنتى خلاص حا اكسر قواديسك

واكسر عصاية الناف وأطلق جواميسك

يرد طين الغيط يعكسلى أفكارى

وألاقى قلب نضيف تهبط قوام نارى

شاعر بكل هوان ويموت فى تقديسك