مين معانا ومين علينا......
ما تتوهيش أبدا يا حُرّه
بين حبايبك والاعادى
دا اللىّ خلـّوا العيشة مُرّه
بيهتفوا بنشيد بلادى
واللى فيهم خدلـُه جُرّه
خللا جوّه زيْ برّه
باتلسع م الشوربه مرّة
أصبح انفخ فى الزبادي
,,,
لسّه خايف يابلدنا
من ضجيج الانفجار
لمّا قالت كل مادنة
انـّه واقع مش هزار
اللى مستنىّ الوزيرة
واللى دفعاه الجزيرة
واللي مدفوع م المديرة
وسهل عنده الانتحار
,,,
إكسري قيد التحديّ
وعلـّي صوتك بالحقيقة
واعبُري علشان تعدّي
بالفرج من وسط ضيقة
وازرعي أرضك جناين
واهدي خيرها لكل صاين
واشعلي النار لليّ خاين
واحدفيه جوّة الحريقة
,,,
يا بلد بأعتب عليكى
لو تصالحي المجرمين
واللى غمّوا ف يوم عنيكي
وقالوا إحنا المظلومين
واللي همّل فى الدروس
لمّا شاف حبّة فلوس
واللي هوّن ع الجاسوس
سفك دم المسلمين
,,,
إهجري كل اللى ضاعوا
وسمّموا للدنيا عيشك
واللي ساعة الجد باعوا
وشرّهم ما وصلش ريشك
بعد ما شافت عنينا
كل خاين للأمانة
ومين علينا ومين معانا
ومين كره أمنك وجيشك
