الاصدار الثالث .. الشاعر / عطيه شواش جيفارا مـــات

جيفـــــارا مات .. البركَه فيكم
جيفارا مات ؛
ولا عَادْش فاضل في البلد
غير بُقسماط
جيفارا هَـات .. كُلْ الرصاص اللي اتمزعْ ..
...........................................تحت الباطات ؛
وعيـد في تشكيل الوطن
......................زي اللي فات ؛
وقيم أساس
.........تلقى النحاس
...................ينفع صاجات
.........................جيفـــــارا مات !!

فاجْمَعْ جَميع الأَوْليـَـا
وامشي ف شوارع دَوْلتــكْ
..................................بالأغبيا
.......................................أو باحتراس
لا تلقى ( حَدْ ) بيكرهك ؛
...........................ولا دولا ناس
وامشي بصدرك يانبي
هوه النبي .. بيحُطْ وَاقي من رصَاص ؟

( حُسنى ) ولبِّسنا الطـُّـرح
وانتَ منشـِّـنْ ( عَ ) اللبَـــاس ،
..............................والحفـَّاضات
.....................................جيفـــــارا مات !!

انا باكره الكَاب والبَاريـه
يحكمني بيه
طب وانت جَيْ وبالقانون
..................اللي انقلبت تدُوس عليه
حلفت ليه ؟؟
........وانت اللي أكِّــدت القسم
ضهري انقسم
..........م الكدب وانت بتترسم
..............................مابين وبين
......................................مالك حزين ؟
لما نزل ع الارض ..جَايبْ مُعْـجزَات
بالصدفه شاف
..............جيفـــــارا مات !!

ساعة هدوء .. خليك خلوق ..
دا حتي شكلك ياهرم
......................زي الخازوق !!
نعمل بك ايه ؟
مين اللي فاضي ياوطن يقعد عليه ؟

طـُومَان يابَـاي
.........يسعد مساك
نُصْ البلد عـَـدَّي الحـدُود .. يقعـُـدْ معاك
يرتاح علي كفـُـوف المَلالي والعمَــمْ

حَيـُّـوا العَلَــمْ ....
..........مصر الجديده بتنخرم
............................بدولار اميركا
................................وبريالات صاحب الحَرَم ْ !!
وتخـُـرْ ناسها الطيبين
.................بكتيره يفضل مننا
......................أو من عيال ام اسماعين !!
متأسفين ..
الضهر فات ياااامُسلمين
جيـــــفارا كان أحلى العيال
.............المدلوقين في الشمس
....................................بيسووا الأمل !!
كان الوليد المُحْـتَمـَـلْ
من أم واحده وألف ليث
.....................شفناه عريس
..........................في الزفه راكب مركبه ؛
......................................والدنيا لسه مكَرْكبَه
مدِّيتــوا إيد متلهلبه
................عايزه النقـُـوط
......................( عتريس) يخبـَّـطْ عَ البيُـوت
.................................بالزيت وكرتونة الرضا !!

( فؤادة ) قالت مش كده !!
.....................( فــؤادة ) بتقول الأدب !!
البنت نايمه ع السرير
...............نعسانه من كتر التعب
دم العيال الطيبين
..........شايفاه علي هدوم الـرُّتَـبْ ،
واللحم بايت ع الرصيف .. لسَّاه رطـبْ
..........................عتريس يدبدب ع العَتَبْ
...................................................إلا النقوط !!
حطت فؤاده ف (حِجْرهَا ) كُل الحَاجَات
من امتي لقيت بختها ؟
ياااامسلمين .. العصر فات
.........................جيـــــفارا ... مات !!

أنا باعتذر لك ياااوطن
ريحة عطـَنْ مَالْيـَه المكان
مش كنت زارعك ياوطن فـُـلْ وريحان ؟؟
إيه اللي حط ف زرعتك جيفة وديدان ؟
والليل سطع شــدَّكْ اليه
بصباعي .. إللي ينقطَـعْ ...علِّمْت ليه ؟؟

أنا بعتذر لك ياوطن
...................من دَه ( و) دَه
........................جيفـَــــارا مَات ... عَلشَان كِدَه!!
ـــــــــــــــــــــــــــــــــــــــــــــــــــــــــــــــــــــ
الشاعر/عطيـــة شـــواش
ـــــــــــــــــــــــــــــــــــــــــــــــــــــــــــــــــــــ