الاصدار الثالث .. الشاعر / طارق ابو النجا ... مصر هي الجنه

مصر هى الجنة

شمرت أيدي اتوضا ؛ من ميَّـة النيل
فرشت بساط فضا ؛ من خضره ويَّـا نجيل
لمحت ع النيل
صورة " المدنه " وهى حاضنه " برج " طويل
قلت : والله دا همُ
( القرآن ) مع ( الأنجيل)
***
ودين النبي بتحدى .... أى بلد في الكون
فيها الوطن يتبدى .. على القداس و شهر الصوم
زيك يا مصر يامدا ... ايدك و شبكاهم
" أهلة الرحمن" بتحضن " الصلبان"
( أجراس) تدق ( آدان )
في حضن " ست الكون "
***
مستحيل .. يامصر ؛ يقطعوا " التوب الجميل "
بتغزله " فاطمه و مريم " على خصرك ؛ من ألف جيل
وهم بيغزلوه .. كانت بلدنا ف فرح
" فاطمه" بكره ح تتجوز و " مريم " ح تكمل الأكليل
***
يامصر ياللي ولادك
بيصلوا أدام بابك
اخوات في كل بلادك
( محمود ) أخوه ( حنـــا)
وصَّـى بكده دينا
قال : إن انا منهم
قال : إنهم مـِنَّـا
يارب قوينا .. واصلح كمان بينا
ولاتشمت أعادينا
ولا تحرمنا م " الجنــه "

الشاعر/ طارق ابوالنجا